बाँकेको जानकी गाउँपालिका १ स्थित बढैया बिओपिको सशस्त्र प्रहरीले अवैध रुपमा भित्रिएको चार क्विन्टल बराबरको भारतीय बोइलर कुखुरा बरामद गरी नष्ट गरेको छ ।
नष्ट गरिएको बोइलर कुखुरा सशस्त्र प्रहरी निरीक्षक टीकाराम गोसाइँ नेतृत्वको मोवाइल गस्ती टोलीले बिहीवार जानकी गाउँपालिका १ स्थित बढैयाबाट बरामद गरेको थियो ।
आरटीआर मे १० प ३४७७ र हीरो यूपी ३४ ए भी २३८९ नम्बरको दुईवटा मोटरसाइकलमा लोडगरी ल्याउँदै गरेको अवस्थामा प्रहरीको मोवाइल गस्ती टोलीलाई देखेपछि कुखुरा र मोटरसाइकल छाडेर चालकहरु फरार भएको बढैया बिओपिका प्रमुख सशस्त्र प्रहरी निरीक्षक टीकाराम गोसाईले बताए ।
बरामद गरिएका बोइलर कुखुराको अनुमानित बजार मूल्य एक लाख ४ हजार रुपियाँ रहेको बताइएको छ । उक्त बोइलर कुखुरालाई साईगाउँ प्रहरी चौकीका प्रहरी हवल्दार नरेश थारू, वडाध्यक्ष मोहम्मद रजा राई स्थानीय बुद्धिजीबी लागायतको उपस्थितिमा जानकी गाउँपालिका १ स्थित बढैया बिओपिको बेस परिसरमा नष्ट गरिएको हो ।
बरामद गरिएको बोइलर कुखुरा र दुईवटा मोटरसाइकलको अन्दाजी मूल्य ४ लाख ५८ हजार रहेको प्रहरीले जनाएको छ । यता नियन्त्रणमा लिइएको दुवै मोटरसाइकललाई नेपालगन्ज भन्सार कार्यालयमा पठाइएको सशस्त्र प्रहरी निरीक्षक गोसाईले बताए ।
