कोहलपुर नगरपालिकाका प्रमुख पूर्ण प्रसाद आचार्यले आधारभुत तहको परीक्षाका क्रममा गलत गर्ने लाई कार्यवाही गर्ने प्रतिबद्धता दोहर्याएका छन ।
कोहलपुर नगर पालिकाको आयोजनामा भएको सर्वदलीय सर्वपक्षीय छलफलका क्रममा मेयर आचार्यले आफू शिक्षा क्षेत्र सुधारमा लागेको बताउँदै गलत गर्ने लाई कार्यवाही गरेरै छाड्ने बताए । ७ दिन भित्र छानबिनले पूर्णता पाउने भन्दै समितिको सिफारिसका आधारमा कार्यवाही गरिने उनको भनाई थियो । आधारभुत तहको नतिजा प्रकाशन लगतै आएका गुनासोका आधारमा छानबिन समिति निर्माणगरि काम भई रहेको उनको भनाई छ ।
ठुलो चुनौति मोलेर आफूले शिक्षा सुधारका काम सुरु गरेको बताउँदै यसमा साथ दिन राजनैतिक दल , नागरिक समाज लगायत सबै सँग उनले अपिल गरे । सुधारका काम सुरु गर्दा थुप्रो खाले चुनौतीहरू आई लागेको भन्दै उनले कसैको उक्साहटमा भन्दा तथ्यमा आधारित भएर विरोध वा सर्मथन गर्न आग्रह गरे ।
विद्यार्थीले पढ्ने वातावरण बनाउन खोज्दा र शिक्षा क्षेत्र वास्तविक अवस्था देखाएर आगाडि बढ्ने आधारहरू तयार गर्नै लाग्दा घेराबन्दी गर्न खोजिएको उनको भनाई छ । परीक्षाको नतिजा प्रकाशनमा गलत भएको गुनासो लगतै आफूले तत्काल परीक्षा सँग सम्बन्धीत कागजात नियन्त्रणमा लिएर छानबिन गर्न लागेको भन्दै अव छानबिन समितिको प्रतिवेदन नआउँदा सम्म सहयोग गर्न उनले आग्रह गरे । सर्व पक्षीय छलफलमा मिश्रित खाले आवाजहरू आएका थिए । कतिपयले नतिजाको विषयमा नगरपालिका आफ्नो तरिकाले छानबिनमा आगाडि बढेकाले सहयोग गर्नुपर्ने धारणा राखेका थिए भने नेकपा एमाले लगायतका राजनैतिक दलले अर्को छानबिन समिति निर्माण गर्न माग गरेको थियो ।
यस अघिका परीक्षामा परीक्षा केन्द्र चयन , केन्द्राध्यक्ष चयन देखिनै सेटिङमै परीक्षा हुने गरेको सम्झदै यस पटकको नतिजा वास्तविक नतिजा भएको धारणा राखेका थिए । उत्कृष्ट नतिजा ल्याउने विद्यालयको विरोध भन्दा आफू उत्कृष्ट नतिजा हासिल गर्न प्रयासरत हुन सुझाव दिएका थिए । कार्यक्रममा बिभिन्न राजनैतिक दल , बिद्यार्थी संगठन , शिक्षक तथा विद्यालय सञ्चालक , सञ्चारकर्मी लगायतको सहभागिता रहको थियो ।
शिक्षक महासघं कोहलपुर नगर अध्यक्ष राम प्रसाद चापागाँईले विगतका गल्ती कमजोरी हटाएर अगाडि बढ्न खोज्दा केही चुनौती आई लागेको बताएका थिए । उनले बिभिन्न आरोप प्रत्यारोपमा उत्रन भन्दा आगामी दिनको नतिजा सुधारका लागी काम गर्न संवद्धहरुलाई आग्रह गरेका थिए ।
कोहलपुर नगरपालिकाले आधारभुत तह कक्षा ८ को नतिजा प्रकाशन बारे गुनासो आए पछि कोहलपुर नगरपालिका वडा नं १२ का अध्यक्ष बिरेन्द्र शाहको अध्यक्षतामा छानबिन समिति निर्माण गरेको छ । जसमा सामुदायिक र संस्थागत विद्यालयका प्रतिनिधि , शिक्षक महासंघ प्रतिनिधि सहभागी छन । छानबिन समिति संयोजक शाहले आफू लाई प्राप्त कार्यादेशको आधारमा निष्पक्ष छानबिन गरेर प्रतिवेदन तयार पार्ने बताए ।
छानबिन समितिले समग्र परीक्षा र कपी जाँच प्रक्रिया , नतिजा प्रकाशन प्रक्रियाको जाँच गर्नुका साथै उत्तर पुस्तीका पुनः जाँच गर्ने संयोजक शाहले जानकारी दिए । त्यसका लागी एक दर्जन विज्ञको सहयोग लिएको उनले बताए । छानबिन समिति लाई २ सामुदायिक विद्यालय र ८ संस्थागत विद्यालय विरुद्ध उजुरी परेको छ ।
