प्रतिनिधिसभा कृषि, सहकारी तथा प्राकृतिक स्रोत समितिले बाँके निकुञ्जको मध्यवर्ती क्षेत्रका जनताले भोग्नु परेको समस्याका बारेमा बुधवार कोहलपुरमा छलफल तथा अन्तरक्रिया गर्ने भएको छ ।
मध्यवर्ती क्षेत्रमा बसोवास गर्दै आएका जनताले जंगली जनावर लगायत निकुञ्जका कारण भोग्नु परेको वास्तविक समस्या बुझ्न समितिका सभापति डा। आरजु राणाको नेतृत्वमा ६ सदस्यीय टोली जिल्लामा आएको छ । बाँके निकुञ्जको मध्यवर्ती क्षेत्रका जनताले भोग्नु परेको समस्याका बारेमा बुधवार दिउसो १ बजेदेखि कोहलपुर नगरपालिकाको चप्परगौडीमा अन्तरक्रिया राखिएको छ ।
अन्तरक्रियामा सरोकारवाला निकायको तर्फबाट निकुञ्जका अधिकारी, मध्यवर्ती क्षेत्रका जनता, राप्ती सोनारी र कोहलपुर नगरपालिकाका जनप्रतिनिधिलाई सहभागिताको लागि अनुरोध गरिएको छ । समितिले बुधवारनै ३ बजेदेखि ५ बजेसम्म कोहलपुरस्थित भेरी शीत भण्डारमा सहकारी सम्बन्धी छलफल गर्ने कार्यक्रम तय भएको छ ।
बाँके राष्ट्रिय निकुञ्जको मध्यवर्ती क्षेत्रमा राप्ती सोनारी गाउँपालिकाको वडा नं. एक, दुई, आठ र नौ तथा कोहलपुर नगरपालिकाको १२ र १३ नं वडा रहेका छन् । मध्यवर्ती क्षेत्रका वासिन्दाले भोग्दै आएको समस्या मिनी संसद्का रुपमा मानिने प्रतिनिधिसभा प्राकृतिक स्रोत समितिमा राख्न पाउने अवसर पाएका छन् । जनताले वास्तविक रुपमा भोग्दै आएका समस्यालाई प्रत्यक्ष हेरेर, बुझेर उहाँहरूले दिएको सुझावलाई ग्रहण गरिने बताईएको छ ।
