१९ असार २०७९, आईतवार
सुर्खेतमा ४५ लाखको चेक र चितुवाको छाला सहित ४ जना पक्राउ


जिल्ला प्रहरी कार्यालय सुर्खेतले चितुवाको छालासहित पक्राउ परेका चार जनालाई सार्वजनिक गरेको छ । आइतबार पत्रकार सम्मेलन गरी पक्राउ परेका उनीहरुलाई सार्वजनिक गरेको हो। पक्राउ पर्नेमा अछामको पञ्चदेवल विनायक नगरपालिका–८ का ३५ वर्षीया कमल शाही, २२ वर्षीया चक्रबहादुर शाही, रामारोशन गाउँपालिका–४ का २१ वर्षीया ओपेन्द्र शाह र दैलेखको चामुण्डा बिन्द्रासैनी नगरपालिका–२ का ३५ वर्षीया विलम शाही रहेका छन् ।

उनीहरुलाई शनिबार पश्चिम सुर्खेतको बराहताल गाउँपालिका–५ बड्डिचौरस्थित एक होटलबाट पक्राउ गरिएको हो । उक्त होटलमा बसेर उनीहरुले दुर्लभ वन्यजन्तु चितुवाको छालाको कारोबार भइरहेको विषेश सूचनाका आधारमा प्रहरीले छापा हानेको थियो ।

उनीहरुको साथबाट केही मोबाइल थान, विलमले बोकेको कालो रङको झोलामा रहेका ४५ लाखको चेक र नगद २७ हजार रुपैयाँ बरामद गरिएको जिल्ला प्रहरी कार्यालय सुर्खेतका डिएसपी रामप्रसाद घर्तीले जानकारी दिए । उनीहरुको साथमा भेटिएको चेक स्वयम् विलम शाहीको नाममा काटिएको देखिन्छ । अहिले तीन थान छालासहित पक्राउ परेकाहरुलाई आवश्यक कारवाहीका लागि डिभिजन वन कार्यालयमा पठाइएको छ ।

Nabintech